Hoppa yfir valmynd

Uppbyggingasjóður EES

Sjóðurinn var stofnaður í þeim tilgangi að vinna gegn efnahags- og félagslegum mismun innan Evrópu. Fyrirtæki og stofnanir í þeim ríkjum Evrópu sem standa lakar efnahagslega geta sótt um styrk í sjóðinn. Þau geta leitað eftir samstarfi við íslensk fyrirtæki sem þannig öðlast tækifæri til að taka þátt í evrópsku samstarfi.

Fjárhæð: Heildarupphæð styrkja er almennt á bilinu EUR 250.000 til 2.000.000 en fjárhæðin er misjöfn eftir verkefnum.

Lönd: Sjóðurinn veitir styrki til verkefna í 15 löndum Evrópu, nánar tiltekið Búlgaríu, Króatíu, Tékklandi, Kýpur, Eistlandi, Grikklandi, Ungverjalandi, Lettlandi, Litháen, Möltu, Póllandi, Portúgal, Rúmeníu, Slóvakíu og Slóveníu.

Fyrirkomulag styrkja: Hvert viðtökuland útbýr sína styrktaráætlun, þ.e. stjórnvöld í hverju ríki ákveða í hvað þau vilja verja styrkjum hvers tímabils. Það eru svo fyrirtæki og stofnanir í þessum löndum sem sækja um styrkinn í sínu landi. Þau geta leitað eftir samstarfi við fyrirtæki á Íslandi, Noregi eða Lichtenstein og þannig skapast tækifæri fyrir íslensk fyrirtæki til að taka að sér samvinnuverkefni við eitthvert af viðtökuríkjum sjóðsins.

Fyrir hvern: Styrkirnir geta hentað öllum tegundum af fyrirtækjum sem uppfylla kröfur um styrkveitingu. Forsendan er hins vegar sú að íslenska fyrirtækið hafi fundið sér samstarfsaðila í viðtökulandinu. Tengiliðir sjóðsins á Íslandi geta aðstoðað fyrirtæki að finna slíkan samstarfsaðila ef þess er óskað.

Tengiliðir: Tengiliðir sjóðsins á Íslandi eru Baldur Pétursson verkefnastjóri hjá Orkustofnun vegna verkefna tengdum orkumálum og Egill Þór Níelsson sérfræðingur hjá Rannís vegna verkefna tengdum rannsóknum, nýsköpun, menntun og menningu.

Heimasíða: Nánari upplýsingar um sjóðinn má finna á sérstakri upplýsingasíðu um sjóðinn á vefsvæði Utanríkisráðuneytisins. Einnig má nálgast upplýsingar um sjóðinn á heimasíðu sjóðsins í Brussel.

Skráningarlisti fyrirtækja: Íslensk fyrirtæki sem hafa áhuga á verkefnum tengdum sjóðnum geta skráð sig á lista sem Utanríkisráðuneytið heldur utan um og er aðgengilegur áhugasömum samstarfsaðilum í viðtökulöndunum 15. Skráning á listann getur þannig orðið upphaf að framtíðarsamstarfi.

Staðsetning: Sjóðurinn er staðsettur í Brussel og er samstarfsverkefni Íslands, Noregs og Liechtenstein. Almennt er sjóðurinn kallaður "EEA grants".